Mat 6 | WSK | STEP | “Nina ninguru sinar talko! Nina ninga kilek yawara yawara kariimet nomotam te beteral se me aringimonko. Nina suwutata beteral mu ninga Nenet duruk te bagoso mu ko koma yawara bo me ningarukkowo.

Matthew 6

Saki alo munan nungaruko agi mu, tetela la nungaruko

1 “Nina ninguru sinar talko! Nina ninga kilek yawara yawara kariimet nomotam te beteral se me aringimonko. Nina suwutata beteral mu ninga Nenet duruk te bagoso mu ko koma yawara bo me ningarukkowo.

2 “Tom nina kariimet nungumik mel mena mu munan nungaralko, mu kawel kari alo betesan iwita me beteralko. Nuna mu biugel ituguma ko kari nunga manorsan se synagogue ningi agi, lage te agi, girisan biugel itugusan, asele nuna nunga nuguting munan betesan. Mu kariimet aringimon ale nunga nunup patawomonko butata betesan. Mu ani nunguningta ninga manorsam, nunup patowaman umutang te nuna nunga koma ningo mu ta taman! 3 Bare ni ka munan kariimet nungumik mel mena nungaruko, mu kari bo ta me ko ikiok se bitarko. 4 Mu tetela la munan bitarko. Se nika Niet, munan suen la ni tetela la betesam se nu ariwoso, mu koma yawara kisokko.

Kaem aru ngatonga ko munan

(Luke 11:2-4)

5 “Se aking tom nina ngatangaralko, mu nina kawel kari alo betesan iwita me beteralko. Nuna pempem synagogue ningi agi, lage biya ko sosang te sanamomon ale ngatangomon se kariimet te nungarkomonko kuesan. Mu ani nunguningta ninga manorsam, nuna nunga koma ningo mu ta taman! 6 Bare tom ni ngatangerko, mu ni kawam ningi kasu nagur ale songkuring bagur ale asele, ka Ba Kaem, ni koma me arigisam, mu aru ngatanguruko. Se ka Niet munan suen la ni tetela la betesam se nu ariwoso, mu koma yawara kisokko.

7 “Se tom ni ngatangerko, mu den suen biya nunguning mena mu karogo me baluko. Kariimet Kaem ko me ikia wore nuna uwutata betesan. Nononga ikia mu den maiya biya balmon mu asele Kaem nuguring ikiokko ma balu gilingisan. 8 Bare nina nuna betesan turan te me beteralko. Mu awuk, nina ninga Nenet mu me arusan la, mu nu anapeya mel nina ko tukunang asan ale ko balalko negawasan, mu nu maingkala la ko ikiso. 9 Se nina ninga Nenet aru maonalko mu iwita balalko:

“Anananga Ba, ni duruk te bagasam.
Nika nip laili kualala biya anirukko.
10 Nika kingdom am tairukko.
Ali imi te mel aratukko ka gemang aniso,
mu am butata aratukko, duruk te aratoso iwitatala. ^{▼▼Mat 6:10 Kaem ko kingdom tairukkowo: Mat 13:40-43; 1 Cor 15:24-26; Rev 11:15.}
11 Anananga na inang kam imi ko mu nangaruko.
12 Anananga memek siwurko.
Saki alo anananga bita maguwusan mu nunga memek ana karogo siwusan.
13 Ni nanga bitar se Satan tairuk me nanga ira arigokko.
Kari memek mu kuting te nanga bataguru toko. ^{▼▼Mat 6:13 Se den sang karogotala iwita aniso: “Ni la King Biya, sokel karogo, nip karogo, pempem la. Nunguning.” Bare batoga sang gira mu te den nukum imi me anikaso.}
14 “Se aking iwita: nina saki alo nunga memek siwural, mu ninga Nenet duruk te mu ninga memek agotala siwu ningarukko. 15 Bare nina saki alo nunga memek me siwural, mu ninga Nenet ninga memek me siwurokko tala. ^{▼▼Mat 6:14 Ana saki alo nunga memek siwunakko: Mat 18:21-35.}

Na yu ko nagiring kaola ko den

16 “Tom nina na ko nigiring kaolal, mu nina me maigal kutuwal ale te ningarkomonko kawel kilek bo ago me beteralko. Kawel kari alo uwutata betesan, mu kariimet te ikimon nuna na ko nuguring kaloman mamon ale nunup te patawomonko. ^{▼▼Mat 6:16 Juda alo saki, tom nuna na kalokasan mu magi kutuwa se tama nuwi nomokete te sapakasan, kariimet te nunga ikimon ale balmon nuna na kaloman ale bagasan ma balmonko.} Ani nunguningta ninga manorsam, nuna nunga koma ningo mu ta taman. 17 Bare tom ni na ko kiring kalo, mu ni kema motam anup, ale mone pituwur, 18 se saki alo ni na ko kiring kalem mu me ko ikimonko. Bare nika Niet, ni koma me arigisam, mu nu kota la ko ikiokko. Nu munan suen la ni tetela la betesam mu ariwoso, ale nu koma yawara kisokko.

Ali ko mel mu mel udagi, Kaem se ko kingdom mu mel gira

(Luke 12:33-34; 11:34-36; 16:13)

19 “Nina ninga mel ningo ningo ali imi te me bolala awuralko. Mu awuk, ali imi te dagor silale no batutumumon ale maguwumonko. Se tere kari kawam barukumon ale melmasak tere gimonko. 20 Bare nina ninga mel yawara yawara mu duruk wonong te bolala awuralko. Umu te dagor silale me no batutumumon ale maguwumonko. Se tere kari kawam barukumon ale melmasak me tere gimonko. 21 Butata beteralko. Mu awuk, kuwim nenenga melmasak yawara yawara te aniso, umutang te tala ninga nengemang motam agotala te anirukko. ^{▼▼Mat 6:19-21 Manga ko den: 1 Tim 6:9-10; James 5:1-3. Duruk wonong ko mel ko ikinakko: Col 3:1-2.}

22 “Nika motam mu kimik guang ko galep. Se nika motam yawarakala, mu gemang motam nikitang ago bagurukko. 23 Bare nika motam memek, mu gemang motam tiromorom ago bagurukko. Se gemang motam tiromorom ago bagurukko agi mu, tiromorom biyala ka irokko! ^{▼▼Mat 6:23 Juda alo nunga bala te mu kari bo motam yawara makasan mu nu saki alo nunga sangukko kari. Se kari bo motam memek makasan mu nu mel guramukko kari.}

24 “Ura kari bo, nu kari bibiya ilagala nunga ura taukko mu me terong. Mu awuk, nu bo meruk, ale bo la ko kuerukko. Aking bo la ko kuring karo tuok, ale bo mu ko kuring merukko. Ni Kaem se manga, ilagala la nunga ura ilupko mu me terong.

Na yu mel ko ikia tawun biya me ka morukko, ko den

(Luke 12:22-31)

25 “Umutang ko ani ninga manorsam, nina na yu aguwaya mu nal ale te marak bagaralko mu ko ikia tawun biya me talko. Aking guang ningimik te beteralko mu betela ko ikia tawun biya me talko. Na yu mu mel gotek. Bare nanga nadera mu asele mel biya. Guang ana nangimik te erenakko mu mel gotektir, bare nangimik nunguningkiri mu asele mel biya. ^{▼▼Mat 6:25 Ana ali imi ko mel ko ikia tawun biya me tanakko: Phil 4:6; Heb 13:5; 1 Peter 5:7.}

26 “Nina inanganang nungarkalko. Nuna na inang me asursan. Ale me gisan kawam te bolala awusan. Bare nenenga Nenet duruk te bagoso mu nunga sinar taso. Se nu me ninga sinar tauk i? Mu nina kariimet mu inanganang nunga kiaman se nu ninguru ninga sinar taukko!

27 “Se nina ali imi te kam maiya biya bagaralko ningamin tugu gurugumu lagaral, mu nina nengeta ninga ikia te tom bo ago ta kunasaral ale bagaral i? Mena.

28 “Aking nina anape ko guang mel tugumalko mu ko ikia ninga moa lagoso ya? Nina tam sisik am nongota pagasan tarigisan wore nungarkalko. Nuna ura me tasan, aking nongota nunga guang me nungursan burangasan. 29 Bare ani ninga manorsam, girakala Solomon bala mel yawarakala nunguningkiri bitakaso, bare tam sisik wakala am tarigisan imi mu, nunga ariga mu noko bala mel ko ariga mu kiaman. 30 Kaem uwutata tam sirsir mu bala tuso. Se melmasak umutang mu am aitakta ko. Se ukirok se batutumumon se marakuk se tama ningi warmon se kanirukkowo. Se nina kariimet mu ikisan, nu me ninga sinar taukko se ye? Mu nu ninguru ninga sinar taukko pa! Nina nengemang ningi nunguning mu katirta agila pa!

31 “Se nina iwita balal, ‘Ana na yu awuk bore nanakko ya?’ ale ‘Anape mel katanakko ya?’ suwuta me balalko. Ale mel umu ko ikia tawun biya me ninga morukko. 32 Kariimet Kaem ko me ikisan mu mel umu ko ikia biyala betesan ale ko sor gi lagasan. Bare nina suwuta me beteralko! Mu awuk, nenenga Nenet duruk te bagoso mu nina mel uwutata talko maingkala ko ikiam. 33 Nina mu Kaem ko kingdom se noko munan diram mu mel gira ko balal ale ko sail tagiralko, umutang mu nu mel suen la sumutang karogo ningarukkowo.

Buta se, ukurukse ko ikup mu aitakta ko ikup imi karogo biguwural ale me ko ikia tawun biya talko. Worem aitakta imi mu aitakta ko ikup mu la karogo terong mam. Se ukurukse mu noko ikup karogo kelemak tala.

34